Jólin eru góður tími til að tala saman

Jólin eru góður tími til að tala saman. Hér eru 6 góð ráð til að hafa í huga til að gera samræðurnar enn skemmtilegri.

Láttu samræðurnar snúast um áhugasvið þess sem þú ræðir við en ekki bara það sem þér finnst skemmtilegt að tala um. Prófum að ræða um það sem hinum aðilanum finnst skemmtilegt.
Hjá flestum var þetta ár í leiðinlegri kantinum en kannski ekki alslæmt. Finnum þau atriði sem við byrjuðum að gera vegna ástandsins og ætlum að taka með okkur inn í næsta ár því oft má finna eitthvað jákvætt í erfiðum aðstæðum. Hvað segir fólkið í kringum þig?
Taktu upp símann! Er þér hugsað til einhvers sem þú hefur ekki heyrt í lengi? Hvað er að stoppa þig? Taktu upp símann og hringdu. Segðu bara að þér þyki vænt um viðkomandi – það er örugglega upphaf á góðu samtali.
Hlustum og metum þögnina. Stundum hugsum við of mikið um hvað við ætlum að segja næst og gleymum alveg að hlusta. Þagnir eru fínar inn á milli í samtölum. Þagnir þýða oft að við erum að hugsa sem gefur okkur innihaldsríkari samtöl þegar upp er staðið.
Notum spurningar. Með því að spyrja sýnum við áhuga. Samræðuspurningar geta dýpkað samtalið. Þetta eru spurningar eins og; Segðu mér meira……eða – af hverju finnst þér það? eða….hvers vegna var það?
Hrósið er sennilega ódýrasta jólagjöfin sem við getum gefið en gæti verið sú dýrmætasta fyrir þann sem fær það. Gefum okkur tíma og hugsum hvaða eiginleika viðkomandi býr yfir og látum hann vita að við kunnum að meta hann.

Gleðilega hátíð.

Ps. Ef þú vilt fá fleiri góð ráð getur þú sótt Gullnu reglubókina hér ókeypis.

Næsta umræðuefni